خدمات التوصيل من كريم وصلتلك!

كلش تهمنا صحتكم وسلامتكم، ويهمنا نحميكم خلال هذه الازمة فقررنا نطلق فئة جديدة لتوصيل البضائع في جميع المدن الي نشتغل بيها اسمها “Delivery” واللي من خلالها نكدر نساعدكم حتى تتجنبون الخروج وتتجنبون الاحتكاك الاجتماعي، حاليا تكدر تدز غراض بيد الكابتن عن طريق فئة التوصيل Delivery وتوصل طلبات، وهو راح يوصللكياها للمكان اللي تريده، وايضا هذه الفئة راح تفيدكم بالايام العادية بعد ما نعبر هذه الأزمة كلنا سوا 💚…
صارت وياك قبل نسيت لابتوبك او شاحنتك ووصلت للدوام وتذكرتها؟
او نسيت شي كلش مهم بالبيت وماتكدر ترجع لان الطريق ازدحام؟
بعد ماكو داعي تشيل هم لان راح نوصلها الك وما يحتاج تدوخ روحك بالروحة والرجعة مرة ثانية، كل اللي لازم تسويه هو:

1- حمل تطبيق كريم من هنا
2- سوي حساب جديد او تسجيل دخول
3- اختر فئة Delivery
4- حدد النقطة اللي تريد الكابتن يستلم منها الطلب، بعدها حدد النقطة اللي تريد الكابتن يروحلها ويوصل الطلب
5- اكتب الاغراض اللي راح يستلمها كابتن كريم منك بصندوق الكتابة اللي راح يطلعلك

سهلة، مو؟
بس اكو شروط بسيطة، راح تساعدنا نوفرلكم خدمة سهلة، سلسة، وآمنة.. الشروط هي كالتالي:

اول شي، شلون تكدر تدفع فلوس الاجرة؟ عندك هواية اختيارات

1- تدفع للكابتن بعد ان تستلم انت الغرض من عنده أو الشخص المستلم يدفعله في حال انت كنت الشخص المرسل
2- تدفع للكابتن الاجرة التقديرية للرحلة أو أكثر من عندها اذا ما ردت ان يدفع الشخص المستلم بمكانك
3- عن طريق بطاقتك الائتمانية
4- عن طريق محفظة Careem PAY

كباتنا ابطال وكد المسؤولية، بس حسب سياسة الشركة اكو اشياء ما راح يكدرون يستلموها من عندك وشروط لازم تلتزم بيهه اللي هي:

1- الأغراض الثمينة مثل الفلوس و الذهب وغيرها ما مسموح إرسالها وية الكابتن.
2- المشروبات الكحولية والادوية بأنواعها ممنوع ارسالها وية الكابتن
2- لازم الغرض اللي تدزه يكفي بصندوق السيارة
3- لازم الغرض ما يتجاوز وزنه الـ 10 كغم
في حال ما توافقت الشروط من حق الكابتن ان يلغي الرحلة.

نحب نأكد لك انه:
كابتن كريم اله حق ان يتحقق من محتويات الكيس او التغليف حتى يتاكد من طبيعة المواد الموجودة بالداخل قبل ما يوصلها لان هو اللي راح يتحمل مسؤوليتها.
الكابتن ما مطلوب منه أن يوصل بضاعة لأكثر من نقطة بنفس الرحلة، دائما تكدر تطلب رحلة ثانية حتى الكابتن يوصلك الغرض للمكان اللي تحبه وما نأخرك ولا نأخر الكابتن💚.
الشركة غير مسؤولة عن أي مفقودات تصير خلال الرحلة.
تاكد انو اكو شخص بانتظار الكابتن يم نقطة توصيل البضاعة حتى يستلمها من عنده، في حال ما كان موجود اي احد الكابتن راح ينتظر 10 دقائق بعدها تنلغي الرحلة ويرجع الطلب لمركز خدمة الكباتن او يحتفظ بي الكابتن لحد ما تتواصل ويانة مرة ثانية، اذا تحب تستلمه لازم تتوجه لاقرب مركز بالمدينة اللي انت فيها حتى تستلم الغرض اللي انت دازه بعد ان تتواصل ويانة.
حتى نسهل حياتك اكثر ونساعدكم تبقون بالبيت فضلا عن دعم كباتنّا، ممكن تطلب من الكابتن أن يشتري البضائع الك من مكان معين اللي تحطه كنقطة استلام، لكن الاتفاق راح يكون بينك وبين الكابتن بهذه الحالات.