خمس طرق تبدأ بيها سنة 2020

خمس طرق تبدأ بيها سنة 2020

بعد يوم وندخل بعام جديد، وعقد جديد. كل سنة اكيد راح تكعد وتكتب اهداف، حتى تحققها بالسنة الجديدة وتخلص السنة الجديدة وبعدك ما محققها كلها 👀.
بس اكو شغلات صغيرة ممكن تسويها.. مو صعب تحققها وراح تنشر ايجابية ممكن تغير حياة انسان 💚.

ابدأ بضحكة

ضحكة وحدة بوجه شخص ممكن تغير يومه، وممكن تنطي ايجابية بيوم هو محتاج هالايجابية وممكن ينقلها لغيرك. هيج راح تكون شاركت سعادتك وية اكثر من شخص بضحكة وحدة بس.

ابدأ بصحتك

أهم مقتنياتنا او املاكنا مو شرط تكون فلوس ولا بيوت ولا سيارات! أهمها هي صحتنا وصحة الناس اللي حولنا.
إذا كنت مدخن، بطل تدخين وحافظ على صحتك وصحة الناس اللي حولك وراح تحس بالفرق ورة فترة قصيرة جدا.
وبوقت انتشرت بي كل انواع المطاعم ومختلف انواع الاكلات (اللي احنا هم نحبه 😁)، انتبه لوزنك وللأكل اللي تاكله وخلي صحي قدر الإمكان.

ابدأ بعطاء

صير كريم، ابدأ السنة بفرحة لاجئ، طفل، فقير او أي شخص محتاج.. مو شرط ان تكون هذه المبادرة مادية.
ممكن تكضي وقت وية شخص مسن بدار المسنين محتاج رفيق، يسولفلك قصص حياته وراح تشوف الفرحة مرسومة بوجهه.
ممكن تزور دار ايتام، وتكضي يوم وية طفل محتاج احد يهتمله، يلعب وياه ويعلمه! بكل بساطة ممكن تكون انت هذا الشخص.
وعدا هذا تكدر تجيك كنتورك، شوف اي ملابس بطلت تستخدمها وتكدر تتبرع بيها لشخص يحتاجها اكثر منك.
او تكدر تتبرع بأي مبلغ مادي من خلال الجمعيات الخيرية.
و اذا تحب، احنة هم سهلناها الك، تكدر تساعدنا نسهل حياة الاف اللاجئين عن طريق التبرع من خلال برنامج مكافآت كريم، والتبرع راح يكون عن طريق تحويل نقاطك اللي تحصلها من الرحلات الى احتياجات اللاجئين اللي راح توصل الى المفوضية السامية للأمم المتحدة لشؤون اللاجئين.

ابدأ بالمعرفة

تقريبا كل شخص بينا حاليا عنده كمية لا متناهية من المعلومات بجيبه، ويكدر يحصلها بدوسة اصبع.. هذا الشي هو من خلال أجهزتنا الذكية وشبكة الانترنت.
ممكن بطريقك للدوام الصبح تسمع كتاب صوتي او تقرأ مقالة بخصوص شي انت حاب تتعلمه وتتطور بي شوية شوية، أحسن من صفنة الازدحام، صح لولا؟
متعرف وين ممكن توصلك وشلون تطورك المعلومات، فجرب وما خسران شي.

ابدأ ببيتك

بنص زخم الدوام والحياة اليومية، ممكن نلكي نفسنا ما دننطي وقت كافي لاهلنا، سواء كانوا امك، ابوك، اخوانك، او شريك حياتك.. حاول تخصص وقت ساعة او اكثر باليوم تشوف بي اهلك، تسال عنهم وتسولف وياهم واسمع شصاير وياهم بيومهم واحجيلهم عن يومك. هذا الشي راح يساعدك بخلق بيئة صحية أكثر بالبيت.

واحد من كباتنا لكى طريقة حلوة لبداية السنة الجديدة، احد زملائنا كان وياه برحلة، وبوسط الحديث والرحلة انتبه انو الكابتن معلك لعبة بابا نويل والكابتن كله انو هذه وراها قصة، الكابتن باشر بالقصة وسولف شون اخذ هذه اللعبة من طفل صغير كان ديبيعها بالشارع، بعد ان انطاه الكابتن فلوس للطفل لكن الطفل ما قبل ياخذها منه بدون ما ينطيه شي بالمقابل، وهذا شي كان هو اللعبة. الكابتن يكول انو هذه اللعبة راح يبقيها بسيارته حتى يتذكر الناس المحتاجة كل ما يشوفها، ويتذكر ان يساعدهم ويدعمهم باللي يكدرله ولو بضحكة 💚

هذه هي بعض المقترحات اللي حبينا نقترحها الكم ان تبدوها ب 2020، شراح تبدي تسوي انت؟
حدد أهدافك، حدد مؤشرات الأداء الاساسية اللي عندك حتى تقيس تقدمك بهذه الاهداف وقسم وقتك.. ماكو شي مستحيل.
شاركنا أهدافك وطموحاتك ل 2020 وخلي الهاشتاك #ابدأ.

يلا، شمنتظر؟ ابدأ 2020!