سوالف عراقية خاصة للسندباد

العراق بلدنا، وشكد ما تريد تبين حبك اله قليل.. فكرت فد يوم اذا اجاك ضيف من غير مدينة لو صرت سندباد وقررت تتجول بالمدن العراقية، شنو راح يكون انطباعك على ابن البصرة؟ شنو اللي يميز الموصل؟ وشلون أربيل تختلف عن النجف؟ وبغداد والبغداديين والبغادّة وين تلكاهم؟

قبل ما تحكم على كتابة هاي المدونة، هاي المدونة انكتبت من كريم ولناس كريم وعلى لسان ناس كريم، الناس اللي تحب تبين جمالية مدينتها وتبث الإيجابية والروح الخضراء وين ما تروح. وتفتخر بعراقيتها وعزيز عليها تراب وطنها.
كل الناس من تبلش تبدي من بغداد، لو من الكاف للميم، بس احنة قررنا نبلش من أغلى مدينة عدنا واللي هي البصرة بشكد ما تسمع سوالف عن البصرة وأهلها قليل بحقها! و صدك لو كالوا أهلها غير.. اول شي يجذبك بالبصرة هو طيبة قلب الناس وكلها تريد تساعدك. اما إذا عرفوا انت ضيف عدهم اويلي عليك ماكو شي يخلصك منهم بعد، ضيافتهم وطيبة قلبهم ما تخلص، ومواقفهم جدا بسيطة بس تبقى ببالك دائما. ما تطلع من البصرة بدون ما تخلي ابتسامة عريضة بوجهك. كل الناس عدها قانون تزور الكورنيش وتشوف منظر الغروب من يم الجسر الإيطالي، مصوري كريم بنفسهم يفضلون هذا المكان بالتصوير بفترة الغروب والشروق لان لقطاته تكون فنية، تخيل اذا تشوفه بالحقيقة شلون لعد! بس قليل من الناس يعرفون ان المتحف العراقي بالبصرة انفتح صارله فترة مو قليلة. وهواية اثار موجودة بي، تابعنا على الانستكرام هنا لان قريبا راح ننزل صور لمتحف البصرة ومثل ما انصدمنا بجمالية المكان وتصميمه انت همين راح تنصدم. المتحف موجود على جانب الكورنيش بالقصور الرئاسية، وتكدر تحدد نقطة الوصول متحف البصرة وكباتنا يوصلوك للمكان بالضبط.
انت وصاعد من البصرة انزل بالنجف وفوت للمدينة القديمة ومن سوك المدينة اطلع و زور العتبة العلوية المقدسة، اكو فد روح وقدسية بهذا المكان اول ما تفوت له حتى الناس اللي تلكاها هناك ناس على نياتها. ابدي الزيارة بدعاء وادعي لاهلك واقاربك وأحبابك. وبعد ما تخلص لا تنسى تشتري دهين احمد الياسري وتاخذه وياك احسن هدية ممكن تاخذها من النجف، افتر بشارع الروان وية الكابتن بالليل وشوف جمالية المدينة وزخم الشوارع هناك.
السندباد لازم يجي لبغداد، واكثر كلمة رح تسمعها بشوارع المتنبي ” المتنبي مربينا.. المتنبي حياتنا “. ما يكمل يوم الجمعة عند البغادّة والبغدادي اذا ما راحوا لقلب بغداد، شارع المتنبي هو اساس للمكاتب العلمية والمؤسسات الثقافية، من تروح هناك بس يعجبك توكف يم الندوات العلمية وتتونس وتسمع شنو الشي الرائد هاي الايام، ومستحيل ما تكلة بي كتاب انت رايده.. لان اذا ما لكيته معناتها ما دورت زين 😊. وازدحام يوم الجمعة بالمتنبي ينضرب بي المثل، فلا تنسى تحسبها صح وتاخذ كريم واخلص من هموم الازدحام. ومناك اطلع وافتر بشوارع بغداد واكتشف بغداد القديمة من يم سوق الصفافير، شارع دانيال، المتحف البغدادي، شارع النهر.. واكيد شارع الرشيد، أقدم شارع ببغداد.

اهل الموصل ناس طيبة، ناس بشوشة وبس تبتسم بوجهك خاصة من تعرفك ضيف جاي الها. واحلى منطقة ضلت على بالنا بالموصل الغابات وهذا الشي ما يختلف عليه اثنين! أي شخص تسأله وين اروح للموصل يجاوبك ” غوح للغابات “. جمال الطبيعة اللي موجودة هناك ما تنوصف، واحلى شي بيها هي مطلة على الكورنيش واكو كافيهات ومطاعم هواية مطلة على نهر دجلة، تكدر تكضي يومك هناك وتغير جو، أخذ عائلتك وياك ولا تنسى تكدر تاخذ المشاوي وتشوي هناك لان اكو هواية مكانات بالغابات تسوي واهس للشوي، يلا احجز كابتن وروح للغابات ودلل نفسك وعائلتك.
معقولة اللي يوصل للموصل مايوصل لقلب كردستان العراق!
كلما تشوف اهل اربيل يبتسمون بوجهك ويكولون بةخيربين😍 ووين ماتروح بأربيل راح تشوف القلعة لان هي من أقدم المعالم هناك وكلش تلفت الانتباه واكيد الها أجواء خاصة، والشوارع كلها تصممت حتى يكون مركز المدينة قلعة اربيل، بحيث تشوفها من خرائط كوكل اربيل دائرة صايرة! من تروح للقلعة راح تلكة سوكها الشعبي، تلكة بي كلشي يجي ببالك من التراث الكردي والاعمال اليدوية والمقاهي القديمة واكيد احسن انواع الكرزات والحلويات الشعبية راح تكدر تشتريها مناك، يعني ما راح تحتار شتودي هدية لأهلك وأصدقائك لان كلشي موجود هناك، ومايصير سفرة بدون صور تذكارية والمكان يسويلك واهس تاخذ احلى الصور. وقلعة اربيل دائما ازدحام فلاتحتار هناك اطلب كريم وخلي الكابتن يوصلك ولاتنسى قبل ماترجع تصعد للقلعة وتشوف إطلالة المدينة شكد حلوة من فوك وروح وي الكابتن لمطاعم اربيل الشعبية وجرب لبن اربيل المدخن والكباب لان اله نكهة خاصة وما تتفوت.

واخر شي، ندري بيك انت تونست من قريت هاي المقالة، وحتى نشجعك اكثر تصير سندباد. روح للمدن الجديدة وللاماكن الذكرناها فوك واستعمل بروموكود ( مدينتي ) واحصل على خصم 20% لرحلتين من تروح وترجع لهاي الاماكن.