مواقف وية كابتن كريم

كابتن كريم هو البطل المسؤول عن توصيلك للمكان اللي تريده. كابتن كريم مثل كابتن الطائرة والسفينة، واللي مسؤول عن حياتك وواجبه أن يوصلك بأمان وبراحة للمكان اللي تريده ويقدملك افضل تجربة اثناء الرحلة.
كل رحلة في كريم هي قصة، كل مشوار للكابتن قصة. القصة تبدي من تدوس يلا وتنتهي بعد ما تنزل من السيارة وتقيم الكابتن. وقصصنا هواية، كلش هواية. وصارت عدنا قصص مؤثرة من الكباتن اللي شاركوها ويانا ورادوا قصتهم توصل لكل ناس كريم، من الكاف الى الميم.

مثل كابتن محمد، اكثر شي يحبه هو السياقة، وهوايته وشغفه أن يطلع بسيارته ويكتشف بغداد وجماليتها:

” اكثر شي احبه السياقة، ودوامي كله سياقة وهاي هوايتي. صارلي سنة وية كريم، واني من القديمين الحمدلله بالشركة، والشغل كلش زين اشوفه، شغلة حلوة ومرتبة واكثر شي احب افتح التطبيق اربعاء وخميس وجمعة ماعندي بيها ارتباط دوام. ودائما دوامي يخلص وج الفجر.
قبل فترة، طلعت من الدوام ساعة بال 3 الصبح، وكلت خلي افتح التطبيق وجنت بالجادرية، اجاني طلب بالبياع والزبون كان حاط نقطة الوصول لمستشفى، كلت خلي اقبل الطلب. والوقت كان المفروض اوصللها بعشر دقايق. اجاني تلفون وطلعتلي بنية، ومبينة جانت مريضة حيل. كلتلي كابتن مروتك، الحكني، ماعندي احد واريد اروح للمستشفى رح اموت يا ستار. دست سريع بالسيارة ووصلتلها بدقيقتين وسويت وصول اصطحاب، انتظرتها ماكو، كلتلي هسة دانزل من العمارة لان تعبانة حيل، صعدت الزبونة وكانت كلش مريضة وتكول اكو ألم بكلياتها، وبالكووة تكدر تمشي.
كتلها محد يمج؟؟ كلتلي لا والله بس اني وزوجي بالدوام، وماكو سيارات.
بصراحة، اني مشيت سرعة، واحنة واجبنا ما نمشي سرعة ومبلغين، بس اني اعتبرت هاي الزبونة امانة جوة ايدي. وديتها للمستشفى ووكفت السيارة بباب المستشفى، عفت السيارة وركضت جبت عربانة. كلت للدكتور اني كابتن من كريم وهاي زبونة مريضة وياية. كتبلي الدكتور راجيتة علاج وكلي روح جيب هذا العلاج. رحت مقابيل المستشفى جانت الصيدلية مفتحة جبت 4 أبر وبطل مغذي ورجعتلها.
كلتلي كابتن روح اخذ راحتك، كتلها شلون اروح؟؟! اني غير يجي زوجج، انتي امانة عدنا ومن يوصل زوجج اني اروح.
الحمدلله صارت زينة، وبال6 وصل زوجها الفجر، اجاني زوجها وكلي اني اتشكر منكم. كتلة قبل ما تكول اني من تكسي كريم، احنة العراقيين غيرة ونخوة. فكتلة عيني الامانة وصلت وان شاء الله مشافى ومعافى. شال فلوس، كتلة هاي لا فلوس ولا شي، المرة اختي وانت اخوية، اذا اهلي تمرضوا واعتمدوا عليك تنطيهم فلوس؟ الرجال بوسني وتشكر مني وسلمت عليهم والحمدلله صارت احسن الزبونة ”

وتصدك عدنا واهب عام همين؟ مثل قصة كابتن سعد:

” هوايتي الرسم، ارسم من اني وصغير وماخذ هاي الموهبة من والدتي واتعلمت ارسم. قبل ما اكون كابتن اني جنت زبون، سمعت بكريم من جنت بعمان، وجنت هناك زبون استعمله. وفد يوم سمعت من اصدقائي ان كريم اجة لبغداد اني ما صدكت! طلبته واجاني كابتن وشغلة جانت مرتبة هواية وقررت اسجل بي كابتن، وصارلي 10 اشهر وية كريم اني.
ورة ما بلشت بكريم باسبوعين، كنت بشارع فلسطين واجاني طلب يم ساحة الموال، وصلت للمكان وسويت نقطة الوصول وصعد الزبون. شفت الزبون جان مرتبك، تلفوناته ما سكتت! ويبقى ديكول اني هسة رح اوصل وبالطريق اني. افتهمت ان اكو مشكلة.. افتهمت من عنده ان ابن اخوه بالمستشفى ومحتاجين دم، وياهو اللي يخابره مكانه بعيد والعملية لازم يسووها وبين ما يوصلون يراد وقت هواية.
اني اخاف من الابرة هههههههه، عندي فوبيا من عدها. بس شفت كل الطرق مسدودة بوجهه. مجرد ما وصلت لمدينة الطب، نهيت المشوار، وسديت التطبيق، وطفيت السيارة. ونزلت من السيارة ولزمته من ايده وكتله، امشي اني اتبرعلك بالدم! اني فئة دمي O+ الواهب العام، جنت ساكت لان اني اخاف من الابرة هههههه، بس هاي حالة انسانية ولازم اتغلب على خوفي انت عراقي واخوية ومني وبية وابن بلدي. الحمدلله والشكر رحت وتبرعت بالدم والله وفقني ما تخربطت ابد وجانت كلش سهلة.
ورة يوم، ضليت بقلق.. اتصلت بي ومن تلفونه عرفت الحمدلله من الرد مالته نبرة صوته بيها خير، وبالفعل بقى يتشكر مني وكتله اي شي تحتاج اني اخوك، الزبون شاف تعاوننا وكلي شفت الناس مال كريم، والتعاون مالتهم. صار الزبون واحد من اصدقائي اللي اشوفهم بين فترة وفترة، وهلكد ما شاف كريم متعاونين وية الزبائن واكو فرصة يزيد دخله، قرر يصير كابتن واخذته ووديته للشركة وهو هسة من احسن الكباتن بالشركة. ”

حلو من تكون عندك قصة تلهم الاخرين بيها، وانت شنو قصتك وية كريم؟
تابعنا على هاشتاك #هذا_كابتن_كريم حتى تعرف كل قصص الكباتن.

كيف تصبح كابتن كريم؟ ادخل على الرابط التالي حتى تسجل وتعرف كل مميزات كريم:
drive.careem.com