نقاطك بكريم تغير حياة انسان

 

شنو هي نقاط كريم؟

نقاط كريم واللي تنعرف همين ب Careem Rewards هي مو نفس الرصيد اللي تصرفه برحلاتك، النقاط هي شئ اضافي تحصله وية كل رحلة تكدر تستعمله بعروض مختلفة وتحصل خصومات، قسائم شراء، او حتى تبرع بي وتنشر الخير بدوسة اصبع.

هاي النقاط هي أكثر من مجرد نقاط بتطبيقك، هاي النقاط هي عمل خيري تكدر تسويه وتساعد بي اهلنا العراقيين وتغير حياتهم للأحسن. احنة فخورين بتعاوننا المشترك وية فريق بناة العراق حتى تتبرع بنقاطك بشكل مباشر من برنامج مكافاَت كريم داخل التطبيق.

منو همة فريق بناة العراق؟

بناة العراق هو فريق تطوعي تأسس عام 2012 يهدف لمساعدة ودعم الفئات المستضعفة وبالأخص الأيتام والأرامل والمهجرين. يقوم الفريق بعدة أنشطة لتحقيق أهدافه، أبرزها تسقيف وإعمار البيوت للفئات المستضعفة لتوفير احد الحقوق الأساسية في الحياة وهي العيش تحت سقف آمن. جميع الانشطة والخدمات يتم تنفيذها من قبل متطوعي بناة العراق، المتطوعون بتنوعهم يمثلون مجتمع عراقي مصغر حيث يتكون هذا المجتمع من ذكور وإناث بفئات عمرية مختلفة وخلفيات علمية مختلفة و انتماءات دينية وفكرية مختلفة.

نقاطك بكريم ساهمت ببناء سقف لام نبأ

قصة ملهمة من سارة، احد اعضاء فريق بناة العراق:

اني سارة مالك ساكنة بغداد عمري 27 سنة، بداية مسيرتي بالعمل الإنساني كان مع والدي لما كان يشتري مواد غذائية ويوزعها للناس المحتاجة او يساعد مريض، كنا نساعده اني واخوتي وكان هالشي اكثر شغلة مفرحة ممكن تصير ويانة.

بعد ما اتوفى ابوية الله يرحمه، بأول سنة الي بالجامعة قررت استمر وسوينة بالجامعة فريق مصغر حتة نجمع تبرعات ونشتري ملابس للأطفال الأيتام او نجمع التبرعات لسد حاجة عائلة وحدة ،لما وصلت ثالث كلية قررت انظم لفريق يكدر يوصل لأكبر عدد من الناس وكنت أريد فريق ما عنده أي انتماءات سياسية أو دينية.

بحثت بمواقع التواصل الاجتماعي ولكيت فريق بناة العراق وتعرفت اكثر على نشاطات الفريق، شاركت بتدريس الأطفال وشفت الشغف اللي يدرسون بي وكمية الطاقة الإيجابية اللي يتعاملون بيها وية الأطفال بالإضافة للأخوّة اللي كانت بينهم. عرفت ان اني بالمكان الصحيح وكسبت عائلة ثانية. شاركت بكل مهمات الفريق بناء ،تدريس ،تحقيق امنية يتيم، إفطارات رمضان ،عيدية يتيم (تجهيز الأطفال بملابس عيد)، الحملات الإغاثية والطبية.

 

هدفي ووجودي بفريق بناة العراق أن نوصل لأكبر عدد ممكن من المحتاجين ونساعدهم ونحسن من حياتهم .حياتي كمتطوعة بفريق بناة العراق حياة مليئة بالإيجابية والحب والإنسانية واحلى شي من تكون اكو مهمة بناء بيت عائلة ويكمل البيت واشوف الفرحة بعيونهم او مثلا من نجهز ملابس للأطفال الأيتام ومن يختارون اللي همه حابيه ويريدوني أكون فرحانه اكثر منهم.

تعاملنا مع كريم أضاف النا نكهة جميلةً لأنه كريم كلش كريم ويانة ومن ضمن التعاون اللي جدًا حبيته بينه وبين كريم هو المشاريع التشغيلية .تخيل وياية بالظروف الصعية اللي دنمر بيها والبطالة، تكون انت سبب بتوفير مشروع صغير لشاب او ارملة اوعائلة بالكامل تسد حاجتها، هذا من ضمن كرم زبائن كريم ويانة من خلال تبرعهم بالنقاط اللي بسببها اكو عوائل صارلها سقف وبيت تحتمي بي. أتمنى يكون التعاون مستمر ونكدر سوة نوصل لأكبر عدد من الناس المحتاجة ونساعدهم ونغير وضعهم.

جدًا افتخر كون فريقنا وسيلة تغيير للأفضل بمجتمعنا وان اني  جزء من هذا الفريق  بالضبط يعني أن تكون وسيلة تغير حياة انسان للأفضل فهذا انجاز . اخيراً احب اوجه رسالة لزبائن كريم…اول شي رمضان كريم وعساكم من عواده .ثاني شي عوائل هواي تنتظرنا كلنا الي نكدر نساعد ولو بشي بسيط محتاجين تبرعاتكم حتى نكدر نوصل لهاي العوائل وتكونون سبب بإدخال الفرحة لقلوبهم وسد حاجتهم… يا رب نكون كلنا نكون عون وسند خاصة بهذا الشهر الفضيل.

شكرا من القلب لكل زبون تبرع بنقاطه لبناة العراق وساهم بتحسين حياة الناس.

هواية من العوائل عراقية مثل ام نبأ محتاجين سقف يحميهم من حر الصيف! خليك كريم بشهر الكرم، تبرع بنقاطك وخلينا نساعد أهلنا العراقيين سوية وية بناة العراق.

تبرع بنقاطك الآن