وياكم بالحلوة والمرة 💚

وية اخر الاحداث اللي صارت وانتشار فيروس كورونا “كوفيد-19 COVID-19” من الواجب ان نلتزم كلنا ونصير ايد وحدة حتى نتجاوز هاي الشدة سوية، بالبداية نحب ننطيكم بعض النصائح اللي تساعدكم تتجنبون الاصابة بهذا المرض:

اول نصيحة تجنب الاختلاط المباشر وي الناس بهذه الفترة، حاول تبتعد دائما عن المصافحة او اي تماس وية الاشخاص، وخصوصا مع الناس اللي تبين عليهم اعراض الانفلونزا او غيرها. إذا توازيت تصافح الشخص، اكو ناس طلعو بافكار مبتكرة لهذا الشي، مثل ضرب العكس او القدمين😉، ننوهك انو اعراض فيروس كورونا ممكن ما تبين حتى مرور اسبوعين من الاصابة فانتبه على نفسك زين 💚.

دائما غطي فمك وانفك وقت العطاس بمناديل معقمة وبعدها ارميها بالمهملات، وبحال ما كانت متوفرة غطيها بذراعك، اهم شي لاتنسى تغسل ايديك بعدها

تجنب ملامسة عينك، خشمك، او حلكك اذا ما مغسل ايدك بالماي والصابون او استعمل معقمات اليد واهتم اكثر بالنظافة الشخصية، لأن فيروس كورونا يدخل لجسمك عن طريق الانسجة المخاطية اللي بعينك، فمك وانفك

من تشوف شخص يكح، يعطس او مبين عليه مريض خليك على بعد مسافة متر عنه، حتى تتجنب امكانية وصول الفيروس الك.. لان فيروس كورونا ما ينتقل بالهواء لكن ينتقل بقطرات اللعاب اللي تنتشر بعد العطسة او الكحة.

الفلوس الكاش اكثر مصدر ناقل للجراثيم! تأكد من تعقيم ايدك بعد كل استعمال، واحنة ننصحك ان تبقى ملازم للبيت، لكن اذا اضطريت تطلع وحجزت كريم يفضل تدفع عن طريق بطاقتك الائتمانية او محفظة CareemPay حرصاً على سلامتك

ألزم البيت ولا تطلع، الا للحالات الضرورية وخلي يطلع شخص واحد من البيت فقط، من ترجع تاكد ان تعقم ايدك ولا تدخل بحذائك لداخل البيت حتى تحمي اهلك باحسن شكل 💚

حاول تتبع النقاط المذكورة بالاعلى بشكل مستمر، صحيح البيت ممكن يصير ممل، بس اكو كومة طرق ممكن تلتهي بيهة مثل:

تفرج فلم! اكو كومة افلام حلوة تطلع على التلفزيون او على الانترنت تكدر تدورها بنفسك وتتفرجها
Shahid and Chill😉: تدري انو تكدر تشترك بخدمة تطبيق شاهد + عن طريق تطبيق كريم؟ ادخل على مكافآت كريم وشوف العروض، اهم شي ان تبقى بالبيت 💚
سولف وية اهلك! شوكت اخر مرة سولفت وياهم او كعدتو تلعبون سوية؟ اكو العاب بسيطة ممكن تلعبهه وية اهلك بالبيت مثل مونوبولي (لعبة بغداد)، طاولي او شطرنج.. تفوتك الونسة ترة!
اسمع اغاني: الاغاني ممكن تساعدك هواية ان تسترخي وتبتعد عن الجهد النفسي اللي ممكن تسببه الك الاخبار المتواصلة، افصل شوية واسمع اغاني واذا تحب تكدر تبدل نقاطك باشتراك انغامي Plus من خلال برنامج مكافآت كريم
اقرأ كتاب وطور نفسك، اكو هواية كتب اكيد دتفوتك، اقراها وزيد من وعيك ومعلوماتك، راح تلكي كومة شغلات تعجبك
نظف بالبيت! تتذكر الزاوية الجوة الكنتور اللي صارلك شهر المفرض منظفها؟ اجة وكتها 👀
اشتغل! احنا بكريم كل زملائنا حول العالم ديشتغلون بالبيت، وعدنا كومة نصائح بهذا الخصوص ومنها:
من تكعد الصبح، حاول تسبح وتتحظر كأنما انت رايح للدوام، حتى تدخل بمزاج الشغل والإنتاج🤩
دور مكان معزول تشتغل بي بعيد عن هوسة البيت قدر الامكان ويكون الانترنت بي قوي
تاكد ان المكان اللي تكعد بي مريح، حتى ما تتعب بالكعدة
اخذ بريك شوكت ما تكدر، الحد الاقصى لاستيعاب الانسان هو ساعة ونص، لازم تاخذلك بريك سريع تسلم بي على اهلك او تاكل شي عالسريع!
نظم يومك، خلي موقت على هاتفك او بجدولك حتى تتذكر وقت الاستراحة مال غدة.. ما تريد تشتغل انت وجوعان
افصل شغلك عن حياتك الشخصية، خلي منبه او بجدولك وقت انتهاء ساعات عملك، حتى لا ياخذك الشغل لتالي الليل.. الشغل ما راح يطير واهم شي ترتاح حتى تعزز مناعتك 💚

آخر شي نحب نأكدلك ان احنة وياك ووية مجتمعنا بهذه المحنة، ودنتخذ عدة إجراءات لمنع انتشار فيروس كورونا تكدرون تشوفوها هنا .وكذلك خدماتنا ما راح تكون متوفرة في أوقات حظر التجول لان لازم كلنا نتبع توصيات منظمة الصحة العالمية ووزارة الصحة العراقية والجهات المعنية بهذا الخصوص.
لا تنسى تتابعنا على صفحاتنا بمواقع التواصل الاجتماعي حتى تعرف آخر التحديثات بخصوص خدماتنا. خليك بالبيت قدر الامكان ودير بالك على نفسك لحد ما نتجاوز هذه الازمة سوية، لان ماكو شي اهم من صحتك وسلامتك 💚